Millosh Gjergj Nikolla

Na të birtë e shekullit të ri,
që plakun e lamë në "shejtnin" e tij
e çuem grushtin për me luftue
ndër lufta të reja dhe me fitue...
Na të birtë e shekullit të ri,
filizat e një toke së rimun me lot,
ku djersë e ballit u dikonte kot -
se dheu ynë qe kafshatë e huej
dhe në marrzi duhej
shumë shtrenjtë t'u paguhej.

Na të birtë e shekullit të ri,
vllazën të lindun e të rritun në zi,
kur tinglloi çast' i ynë i mbramë
edhe fatlumë
ditëm me thanë:

S'duem me humbë
në lojë të përgjaktë të historisë njerëzore,
jo! jo! s'i duem humbjet prore -
duem ngadhnim!
ngadhnim, ndërgjegje
dhe mendimi të lirë!

S'duem, për hir të kalbsinave të vjetra,
që kërkojnë "shejtnim",
të zhytemi prapë në pellgun e mjerimit
që të vajtojmë prapë kangën e trishtimit,
kangën monotone,
pa shpirt, të sklavnisë -
të jemi një thumb i ngulun
ndër trutë e njerzisë.

Na të birtë e shekullit të ri,
me hovin tonë të ndezun peshë,
ndër lufta të reja kemi m'u ndeshë
dhe për fitore kem' me ra fli.